انتقد عصام سلطان، نائب رئيس حزب الوسط، موقف الدكتور عبد المنعم أبو الفتوح، رئيس حزب مصر القوية من الوضع السياسي الراهن:" بلاش الحنية الزيادة وأنت بتتكلم عن الخائن القاتل المنقلب ، وتذكر القسوة والكره لدرجة العمى حين كنت تتكلم عن المنتخب".
أضاف "سلطان" عبر حسابه الشخصي على فيس بوك:" أخى الدكتور عبد المنعم صدمة الناس فيك كبيرة ، هرولت إلى الطرطور بمجرد إشارة ، وتمنعت عن المنتخب لمرارة فى نفسك لم تستطع التغلب عليها "، مضيفاً: "عمرك ماكنت أبدا بتاع لف ودوران ، وكلام فى كلام ، ومسك العصاية من النص ، وتصفية حسابات شخصية بحتة ، وسكوت على حق واضح ، وطناش على باطل أوضح".
وتابع: " أخى تعالى إلى رابعة العدوية ، لدعم البسطاء الذين يدافعون عن أصواتهم فى أكثر من عشر جولات إنتخابية خلال عامين .. بلاش حكاية الأصوات .. طب تعالى لدعمنا ضد الانقلاب زى ما دعمناك فى الإنتخابات .. هى مش السياسة بردو خد وهات ، مصالح يعنى .. ؟ وإلا أنت نظامك وأن وى ..؟ ".
أشار: "بصراحة أنا مشفق عليك ، لا يحطك التاريخ جنب البرادعى وشفيق وبكرى وعكاشة وإلهام ودحلان وبهلوان، خليك مع الغلابة تكسب .. وشيل الاخوان ومكتب الارشاد والشاطر والارتكاريا من دماغك .. والله العظيم ٨٠٪ من اللى هنا مهومش اخوان .. ! دا احنا معانا ليبراليين ويساريين وناصريين ، مسلمين ومسيحيين ، متدينين ومش متدينين ، وفى ناس مابتصليش خالص وما بتصومش وهما أحرار ، ومحدش له دعوة بحد ، الاحترام المتبادل يسود الكل ، وضد الانقلاب ، وبس ".
وتابع: "اعتبرنى باتكلم بالنيابة عن أصحابك وأصدقاءك وإخوانك وأحبابك اللى زعلانين منك أوى ومش راضيين يكلموك من كتر الزعل ، واللى كانو واقفين معاك فى جولة الإنتخابات الاولى ، ضد الكل بمن فيهم مرسى ، يعنى مش إخوان ولا حاجة".
أضاف: "أسهل حاجة كنا فى الوسط عملنا زيك بالضبط ، واتلككنا بخلافنا المعروف مع الإخوان ، بس كنا هندوس على مبادئ كتير أوى .. ومكناش هنعرف ننام بالليل من تأنيب الضمير .. يارب نشوفك زى ما كنت زمان ، واقف مع الحق من غير حسابات و لا توازنات".
واختتم "سلطان":" إنت بتفكر فى إيه ..؟ هو أنت و حمدين صباحى فاكرين إن السيسى هيعمل انتخابات رئاسية وهترشحوا نفسكوا مرة تانية ..؟ إصحى ياراجل ياطيب .. اصحى يانايم .. وحد الدايم".