يروي أحد المواطنين فصلاً من مأساة دولة العسكر، وبلطجة شرطة داخلية الانقلاب.
يقول المواطن شريف كمال، عبر حسابه على موقع التواصل الاجتماعي “فيس بوك”: امبارح كان عندنا تجمع للشباب “الچيبرز” عند محطة بنزين أمارات مصر في المعادي قبل كارفور علي الدائري، وبعد ما الكل اتجمع في اربع عربيات رجعوا بظهرهم حوالي١٥ متر علشان يدخلوا المحطة و يملوا بنزين و انا كنت منهم تاني عربية، واذ ا فجاة واحد بينادي عاليا و رافع حاجب و منزل التاني ، طلب مني الرخص استغربت علشان هو لابس مدني مش لبس شرطة، ودار الحوار بيننا كالآتي:
هو: رخصتك ورخصة العربية لو سمحت.
أنا: هو حضرتك ضابط مرور؟!!!
هو: لا أنا ضابط مباحث.
أنا: اتفضل اهي الرخص.
هو: ادخل حط بنزين و استناني.
انا: هو انت هاتخليني اجري وراك و بهدلة و كدة؟؟ او عاوزني اقف اتحايل عاليك؟ علشان لو كدة خلاص خد الرخص و ابقي اخدهم من المرور بتاعي .
هو : خش حط بنزين .
سمعت الكلام و دخلت احط البنزين .. لفت نظري انه راكن عربيته الشخصية جوة المحطة و فاتح باب عربيته مش عارف بيعمل ايه!!! و فوجئت ان عربيته مافيش عليها لوحة الارقام و لاقيته ماشي جوة المحطة بجانب طرمبة البنزين و مولع سيجارة و مش في دماغه اي حاجة ولا كأنه كان ممكن يموتنا كلنا…
جالي عند العربية ..
هو : رخصك اهي يا استاذ بس انت اخدت غرامة ١٥٠٠ جنية السير عكس الاتجاه.
انا : طيب هو حضرتك ليه وقفتني انا بالذات من دون العربيات المخالفه؟!!
هو : كدة رخامة!!!
انا : طيب بمناسبة الرخامة هو ينفع تكون ضابط و بطبق القانون و تمشي بعربية من غير ارقام؟
هو: ايوه ينفع و مالكش دعوة.
انا : ازاي ماليش دعوة المساواة في الظلم عدل… انت اخدتني مخالفة انت مين اللي هايخلفك؟!!!
هو : انا اخلفك ده بمزاجي علشان انا بخالف اللي زيك بس انا لسه ماتخلقش اللي يخالفني.
انا : طيب انا هاخد صورة لعربية حضرتك و انزلها علي النت و نشوف اللي بيخالفك اتخلق و لا لسة .
هو : طبعا ياريت و بقولك اية.. استني اقف جنبها علشان تصورني انا كمان و تعمل اللي نفسك فيه و بالمرة ممكن اتشهر.
و قام بالنداء علي صديق له ضابط بس لابس ميري علشان يقفوا و يتصوروا مع بعض مع عربيته اللي من غير ارقام و انا اخبط راسي في اكبر حيطة…
ويضيف المواطن: طبعا بغض النظر عن ان كل الناس اللي في محطة البنزين كانوا سامعين الكلام دا .. و كان صادمهم السيجارة اللي مولعها،لكن العمال و المسؤولين عن المحطة خافوا يقولوله اطفي السيجارة.
وتابع : انا للاسف مش عارف اسمه بس حبيت اشارك معاكم صورته بجوار عربيته من غير الارقام و كمان مولع السيجارة و علشان يكمل استفزازه ليا و علشان يوريني انه مش هامه اي حد قام و بمنتهي الطفولية عامل بايده علامة النصر.
علقت صفحة الشرطة المصرية على شبكة التواصل الاجتماعى “فيس بوك” بالقول: ان هذه الواقعة قيد التحقيق ، وانه لا تهاون فى العقوبة على كل مخطىء.
